<center>السلام عليكم ورحمة الله وبركاته
بصراحة من زمان وهالسؤال يدور ببالي .. كنت أقرأ مواضيع الساحة وأقول لنفسي .. وش سبب تميّز هالموضوع؟ وليه هالموضوع صار ماصل؟
خلونا من المواضيع الماصلة الحين .. لأن المصالة معروفة .. وإن اختلفت مقاديرها بين الناس ..
تعالوا نتناقش عن الموضوع المميز .. الناجح .. اللي يرسخ بالبال .. كلنا نحب نكتب موضوع مميز .. ونتمنى يكون لمواضيعنا صدى حلو .. وأثر طيب على الناس .. لكن ياترى وش الأشياء اللي تخلي" موضوع ما" يكون ناجح؟ شوفوا .. أنا باقول اللي أشوفه .. وبعد كذا اللي "بيدودل" دلوه
- على قول النمرة –
الله يحييه .
أي شخص بيكتب موضوع وبيعرضه على الملأ لازم يتوقع كل ردود الأفعال الممكنة .. الرضا .. السخط .. المعارضة .. المديح .. الهجوم .. رأي مخالف بأدب .. رأي معارض بوقاحة أحياناً .. كل ردود الأفعال محتملة ..
وساعات ردة الفعل نفسها تكون دافع للكاتب .. سواءً كانت معه أو ضده .. وراني قمت أخربط؟ شكلي طلعت عن الموضوع ..
<----- وش تبين أنتي؟؟؟؟ <IMG SRC="http://www.eqla3.com/file/ubb/icons/icon816.gif" border=0>
المهم .. إذا جيت تكتب موضوع فأمامك عدة خيارات .. وكل خيار – وطماط – له مميزاته وعيوبه .. وطبعاً اختيار نوع الموضوع يحدده هدف صاحبه منه .. والشي اللي داخله ويحاول يوصّله لنا ..
خلونا نبدأ بالمواضيع الهادفة .. اللي يكتبها صاحبها لهدف ديني أو اجتماعي أو غيره من الأهداف .. من ناحية المواضيع اللي لها صبغة وعظية مثلاً أو تتخذ صفة النصيحة وتذكير الذات والآخرين بأمور ننساها ونغفل عنها .. هالمواضيع عادةً يقع صاحبها في فخ "المباشـَرة" وهذا شي يصعب تلافيه إلا من كاتب مقتدر يمرر فكرته بشكل غير محسوس ويطلع القارئ من الموضوع بنشوة اكتشاف الهدف الموجود فيه .. والأدهى والأمر من عيب المباشرة هو إن صاحب الموضوع يكون بين مطرقة القلوب البيضاء اللي تنظر لصاحب الموضوع نظرة قد يكون أقل منها بكثير .. وبين سندان سيئي الظن اللي يعتبرون هالنوعية من المواضيع مجرد تلميع للذات أو نفاق أو غطاء يستر فيه صاحب الموضوع عيوبه وأخطائه الفعلية .. لكن عموماً صاحب الموضوع إذا قدر يوصّل فكرته لغيره بطريقة ناجحة يكون موضوعه هو أنجح المواضيع على الإطلاق خاصةً إذا انكتب بأسلوب إقلاعي .. وهذا فن لا يجيده إلا قلة من الناس .. عسى اللي عطاهم ما يحرمنا
عارفة إني خبصت الأمور على بعض بس هنا يجي دور الذكاء .. الأذكياء بيرتبون كلامي ويطلّعون منه شي مفهوم <IMG SRC="http://www.eqla3.com/file/ubb/icons/icon827.gif" border=0>.. ( إيه رقـّعي بس )
فيه نوعية ثانية من المواضيع مالها أي هدف جاد .. لكنها مكتوبة لغاية وحدة هي الضحك وسعة الصدر .. وأغلب هالمواضيع تكون مقبولة بشكل كبير .. لكن بعد ما تطلع من الموضوع وتقرأ غيره .. أو تقفل الجهاز .. يتلاشى أثر هالموضوع لأنه ما فتح عيونك على شي جديد ولا أثار بذهنك أي تساؤلات .. غير ذلك كثير من هالنوعية يكون فيها جزئيات ممكن تضايق بعض القراء مثل اللي يكون فيها تلميحات "عيب" أو كلام عن مغامرات عاطفية وغزل وخرابيط .. أو عن تحشيش و"ارتفاع" على قول المقلعين – على فكرة هالتعبير من التعابير اللي ماعرفتها إلا من الإقلاع – هالأمور ممكن تسبب الضيق للقارئ .. ومعذور لو حس بكذا وما أحد يقدر يلومه ..
وفيه مواضيع بثرة طبعاً ومالها سنع ومن يوم تشوفها تحس ودك تسأل صاحبها .. أنت وش تبي؟ وأعتقد هالنوعية ما نختلف على مصالتها .. وإن كان بعض المواضيع ظاهرها البثارة لكن أحياناً تحتوي على طرفة وما نقدر نقول عنها ماصلة .. مثل موضوع شفته من فترة بمنتدى الكمبيوتر كان صاحبه يسأل عن مكان علامة التعجب أو حاجة ثانية تشبهها ما أتذكر .. كان يسأل عن مكانها بالكيبورد وهو كاتبها من الأساس
.. بس يستهبل وكانت بعض الردود مصدقة كلامه
.. أنا بصراحة ضحكت كثير على هالموضوع
المهم .. بعد ما تميلحت وشرحت لكم أنواع المواضيع – وجزء كبير من هالكلام اقتبسته من رأي لأم عزيز S:.. من باب إحقاق الحق – ودي قبل ما أختم أقول لكم الموضوع الناجح بنظري .. اللي إذا قرأته تمنيت إن ربي يعطيني مثل ما أعطى صاحبه .. يعجبني الموضوع اللي يحمل هدف وينتقد وضع معين بأسلوب طريف مقبول ويوصل للقلب بسرعة .. خاصةً إذا كان مكتوب من دون أي تكلف .. على سجية صاحبه ..
من جد أحس إن الواحد عشان يكون موضوعه قريب من النفس لازم يكتبه بتلقائية ومن غير تكلف (علّمي نفسك تكفين ) .. يعني بالعربي
<FONT COLOR="Red"><FONT size="+3">Be your self</FONT s></FONT c>
الترجمة : يعني اكتب بقناعات وأسلوب ولد جيرانكم
والأهم إنك تكتب اللي يرضيك حتى لو أسخط غيرك أو ما أعجبهم .. مادامك ما غلطت ولا دافعت عن باطل إذاً لا تحسب حساب "المعارضة"
<------ صدام
أنا خلاص خلصت .. اللي عنده رأي يبي يقوله الله يحييه .. مع إني قلت كل شي وعطيتكم الزبدة في الآخر .. تدرون .. لا تقولون شي خلاص <IMG SRC="http://www.eqla3.com/file/ubb/icons/icon827.gif" border=0>.. أمزح
.. أتمنى نشوف آراء كثيرة .. وياليت نتناقش بشكل عام من غير تحديد أسماء عشان نتكلم على راحتنا .. يعني نحش على راحتنا
..
توجيهات أثناء كتابة الرد :
1-اكتبوا بسطر "واطمروا" سطر .
2-كل سؤال بصفحة .
3-ممنوع استخدام الطامس .
4-ممنوع استخدام الكيبورد .. اكتبوا بأقلام ماعلي منكم .. دبروا أنفسكم .
5-ممنوع الغش .. واللي بيغش ترى باجلده .. احذروني تراني بطلة بالكاراتيه والجودو والتايكوندو والبلياردو.
<------ تحسبه زيهم
يالله .. دودلوا سطولكم على راحتكم .. وترى هالموضوع باسمي لكنه للجميع .. يعني خذوا راحتكم أنا شايلة يدي منه لأني زيكم أبغى أتعلم - خاصةً من العمالقة - كيفية كتابة موضوع ناجح وراقي .. يعني هذا ما يُعتبر موضوعي .. حتى يمكن ما أرد عليه .. لأنه ما يخصني لحالي .. ولا أناقش فيه مواضيعي الخاصة ..
يالله تصبحون على خير
على فكرة يقولون حوطي رايح لمطعم شاف على الباب لوحة "ادفع" قال: هذا وأنا ما بعد دخلت !!!
قديمة؟ عادي .. بس شكل هالمطعم يقرب لشركة الاتصالات <IMG SRC="http://www.eqla3.com/file/ubb/icons/icon827.gif" border=0>
<----- اخلصصصصصصصصصصي <IMG SRC="http://www.eqla3.com/file/ubb/icons/icon820.gif" border=0>
خلاص لا تدفون
.. سلام
</center>
<IMG SRC="http://mypage.ayna.com/jude15454/semi" border=0>
<FONT COLOR="Beige">اللهم إني أعوذ بك أن أشرك بك شيئاً وأنا أعلم وأستغفرك من الذنب الذي لا أعلم
سبحانك اللهم وبحمدك أشهد أن لا إله إلا أنت أستغفرك وأتوب إليك</FONT c>
[This message has been edited by سميّ النور (edited 18-03-2001